علقت نهاد ابو القمصان رئيس المركز المصري لحقوق المرأة، على قضية الوصاية التي يناقشها مسلسل “تحت الوصاية”، وتساءلت: “تفتكروا الجد والعم يورثو في تركة ولاد حنان (منى ذكي) ولا بيسرقوهم بس؟!!”.
وقالت في منشور على صفحتها الرسمية بموقع التواصل الاجتماعي “فيسبوك”: “في ناس متخيلة إن الولد في التركة بيمنع أي حد من أنه يورث.. دا مش حقيقي لأن الورثة بيورثو بطريقتين؛ إما فرض محدد أو بالتعصيب يعني الباقي بعد أصحاب الفروض”.
وأوضحت: “مين بقى المحظوظين أصحاب الفروض؟.. اللي ليهم فرض محدد ومعلوم بنسبة محددة، أما النص أو الثلثين أو الربع أو السدس حسب درجة القرابة للمتوفي.. بس الأساس أن أصحاب الفروض المحظوظين دول أغلبهم البنات والسيدات والاستثناء من الرجال اللي يورثو فرض الزوج والأب”.
وأضافت: “أما أصحاب التعصيب؛ اللي بيورثوا ما يتبقى من أصحاب الفروض هما الأولاد والرجال ما عدا الأب والزوج فهمتو حاجة؟”.
وتابعت: “يعني دايمًا نطلع لأصحاب الفروض الأول وبعدين نطلع الباقي للورثة بالتعصيب يعني في حالة حنان يتقسم المركب أو الريع (العائد) بتاعه إزاي”.
وأوضحت: “حنان الزوجة لها الثمن، والجد أبو الزوج له السدس والأولاد ياسين يورث بالتعصيب ومعاه أخته فرح ما يتبقى بعد أصحاب الفروض بعد توزيع السدس والثمن، طب والعم دوره أيه؟ ولا حاجة، راجل نطع رامي جته على مركب مش بتاعته وكل اللي لأبوه فيها السدس وفرض نفسه وبيسرق على حس أن أبوه اللي هو الجد هو الوصي على أموال القصر ياسين وفرح، فبيدي أمهم ربع اللي كان أبوهم بيكسبه ويسرق الباقي علشان يجهز بيته ويتجوز من مال الأيتام القصر، لأن القانون لا يعرف بالأم لكن الجد والعم يسرقوا عادي”.
وتابعت قائلة: “ليه؟.. لأن المادة (1) من قانون الولاية على المال اللي من سنة 1952 يعني من 75 سنة.. بتقول: للأب ثم للجد الصحيح إذا لم يكن الأب قد اختار وصيًا للولاية على مال القاصر وعليه القيام بها ولا يجوز له أن يتنحى عنها إلا بإذن المحكمة، طب والأم لمؤخذة؟ أم مين لمؤخذة؟!”.