بيقول بعالجهم.. مأساة زوجة: جوزي بيعمل علاقات مع ستات مريضة نفسيا

“جوزي دكتور نفسي وبيعمل علاقة مع العيانين بتوعه” بتلك الكلمات روت زوجة داخل محكمة الأسرة لتحيا مصر عن زوجها الذي يعمل كطبيب نفسي وله عيادته الخاصة التي يستقبل فيها سيدات تعاني من أمراض وأضطرابات نفسية مستغلا عمله ويقوم بمعاشرتهم بحجة العلاج وتقديم لهم الأهتمام الذي يحتاجونه .

جوزي لما أتقدملي خوفت منه عشان وسيم 

بدأت الزوجة حديثها لتحيا مصر :” أنا وجوزي متجوزين من 3 سنين وعندنا بنت جوزي أتقدملي وهو دكتور ودارس طب نفسي وفاتح عيادته الخاصة وشاطر جدا في شغله بس انا وقتها كنت خايفة أوافق عليه عشان وسامته وجاذبيته كانت بتحسسني أن الستات مش هتسيبه في حاله خصوصا أن طبيعة شغله بتخليه يتعرف علي ستات أشكال وألوان لكن في الاخر وافقت بسبب أقناع أهلي ليا “.

أستغل أمراضهم النفسية وكان بيعاشرهم 

وتابعت الزوجة :” مجرد ما عرفت أني حامل في اول سنة جواز بدأت أدرك أني متجوزة شيطان بيستغل الستات اللي بتروحله العيادة ويعلقهم بيه ويجذبهم بإهتمامه عشان في الاخر لما يطلبهم للعلاقة الجنسية ميقدروش يقولوا لا وكل ده عرفته من جيراني والستات والرجالة اللي في المنطقة اللي فضحوه وجم قالولي سمعته وسمعة عيادته بقيت عاملة أزاي بسبب كم الستات اللي ضحك عليهم وخد فلوسهم وبدل ما يعالجهم كان بيستغلهم جنسيا عشان يشبع رغباته وميوله “.

لما واجهته قالي عملت كدة عشان اعالجهم 

وأختتمت الزوجة حديثها :” قررت في يوم أواجه جوزي بكل اللي سمعته من سكان المنطقة وهو رد بإنكار وقالي ” ده مجرد أهتمام بقدمه ليهم عشان يتعالجوا و حالتهم تتحسن ” كنت مصدومة من كلامه ومعرفتش أرد عليه غير بإني أسيبله البيت وأخد بنتي وأروح علي بيت أهلي ووقتها قررت أخلعه في المحكمة لما حسيت أن الخيانة اللي فيه دي طبع ومش هيتغير وخصوصا أنها مش ست واحدة وخلاص لا ده بيعمل كدة مع ستات كتيرة وكلهم بيقعوا ضحايا في الفخ اللي هو ناصبهلهم واللي وقعت فيه أنا شخصيا وبدعي أن ربنا يعوضني من بعده ويجيبلي حقي “.

اقرأ من المصدر الرسمي